TAYABAS CITY, Quezon, Philippines — Nailigtas ng isang residente sa bayang ito ang isang kakaibang uri ng Philippine owl o kuwago, kamakalawa.
Ang naturang species ng Philippine scops owl ay agad nai-turnover ni Dexter Sacramento ng Barangay Calumpang sa Tayabas City Environment and Natural Resources Office (CENRO), na siya namang nagdala ng naturang ibon sa City Veterinarian Office.
Ayon kay Isagani Requizo, City Veterinarian, ang naturang ibon ay malusog, walang sign ng stress, walang sign ng nasal at ocular discharges, walang hirap sa paghinga, walang ebidensya ng bali at dislokasyon ng buto at walang ebidensya ng anumang mapanganib na nakakahawang sakit.
Pinakawalan din ng araw na iyon ang kuwago at ibinalik sa kaniyang natural na tirahan.
Ang Philippine scops owl o otus megalotis ay isang karaniwang kuwago na endemic sa Pilipinas, kung saan sila ay karaniwang matatagpuan sa mga kagubatan. Kabilang ito sa Appendix II ng Convention on International Trade in Endangered Species (CITES).