10 ilegal na gumagawa, nagbebenta ng paputok sa Bulacan natimbog
MANILA, Philippines — Inaresto ng Philippine National Police (PNP)-Firearms and Explosives Office (FEO) ang nasa 10 illegal manufacturers, dealers at retailers ng mga paputok sa Bulacan.
Ayon kay PNP-FEO acting chief Police Colonel Paul Kenneth Lucas ang pag-aresto sa mga illegal manufacturers ay bunsod na rin sa kautusan ni PNP chief Police General Rodolfo Azurin Jr. na imonitor ang mga establisimyento na lumalabag sa batas.
“May mga nahuli sa Bulacan, meron ‘yatang 10 doon na nahuli at na-file-an ng kaso,” ani Lucas.
Sinabi ni Lucas na batay sa impormasyon ng PNP, ipinagbabawal ang mga paputok na overweight o hindi hihigit sa 0.2 gram o hanggang 1/3 ng teaspoon; oversized na super lolo, giant whistle bomb; fuse na hanggang anim na segundo; imported na paputok; mixture ng phosphorus o sulfur na may chlorate.
Nilinaw ng PNP na ang mga komunidad ay dapat na maglaan ng lugar kung saan maaaring magpaputok.
Ang mga paputok na pinapayagan o maaaring gamitin bilang fireworks display ay kinabibilangan ng baby rocket, bawang, El Diablo, Judas’ belt, paper caps, pulling of strings, kwitis at “triangulo” habang maaari naman sa residential areas ang mga paputok na butterfly; fountain; jumbo regular; luces; mabuhay; roman candle; sparklers; trompillo at whistle.
Nilinaw naman ni PNP Spokesman Col. Jean Fajardo na walang ipinatutupad na “ban” laban sa mga manufacturers at retailers ng firecrackers at pyrotechnics.
Kailangan lamang aniya na ilagay ng mga nagbebenta sa itinalagang lugar ang kanilang mga ibinebentang paputok.
Alinsunod sa Republic Act No. 7183, pagmumultahin ang lalabag ng nasabing batas ng hanggang P30,000 at kulong na hanggang 1 taon.
- Latest
