2 rider dedo sa 16-wheeler truck
RAGAY, Camarines Sur, Philippines — Nagkalasug-lasog ang katawan ng dalawang rider matapos bumangga ang kanilang sinasakyang motorsiklo sa kasalubong na 16-wheeler na trailer truck sa kahabaan ng Andaya National Highway sa Brgy. Binahan Proper ng bayang ito, kamakalawa ng hapon.
Sinubukan pang isugod sa Ragay District Hospital pero parehong nasawi habang nilalapatan ng lunas ang mga biktima na sina Rommel Tolentino Dela Cruz, 22-anyos, at Jerick Valdez Pula, 25-anyos, kapwa construction worker at residente ng Brgy.Binahan Upper, Ragay, Camarines Sur.
Arestado naman ang truck driver na si Ryan Lizardo Jovillano, 40-anyos, residente ng Brgy.Antipolo, Minalabac.
Sa ulat, dakong alas-4:20 ng hapon, mabilis na binabagtas ng Racal motorcycle ng magkaangkas na mga biktima ang kahabaan ng highway nang mawalan ng kontrol at kinain ang linya ng kasalubong na trailer truck (MBE-5131). Huli na para iwasan sila ng trak dahilan para mabangga.
Kapwa duguan at walang malay na isinugod sa pagamutan ang mga biktima pero namatay din dahil sa matinding pinsala at sugat na tinamo sa katawan.
- Latest