Pagawaan ng paputok sumabog: 5 patay, 7 sugatan

MANILA, Philippines — Lima katao ang kumpirmadong patay kabilang ang isang senior citizen habang pito pa ang sugatan nang sumabog ang isang bahay na ginawang pagawaan ng mga firecrackers o paputok at sumiklab ang malaking sunog kahapon ng umaga sa Calamba City, Laguna.

Kinilala ni  P/Col. Condrado Masongsong, hepe ng Calamba City Public Order and Safety Officer (POSO), apat sa mga nasawi ang unang kinilala na sina Leticia Coral, 83; James Darwin Coral, 22;  Ryan James Gutierrez, 18 at Kenneth Buebo, 24 habang inaalam pa ang pagkakakilanlan ng isa pa.

Nilalapatan naman ng lunas ang mga suga­tan na sina Judd Nelson Corral, Genaro Valentino, Isagani Batalla, Joel Escoton, Joseph Alcantara at dalawang iba pa.

Ayon kay Brgy. Canlubang Chairman Larry Dimayuga, naganap ang pagsabog dakong alas-10 ng umaga sa GK Village, Sitio Majada Loob, Canlubang ng nasabing lungsod.

Lumalabas sa im­bestigasyon na nanggaling ang pagsabog sa kusina ng bahay hanggang sa sumiklab ang apoy at nakulong ang lima na mga biktima na kanilang ikinasawi.

Limang kabahayan din ang sinasabing na­damay sa sunog.

Sinasabing iligal na gumagawa ng mga paputok para sa Pasko at Bagong Taon ang bahay ng mga biktima.

Patuloy na nagsasa­gawa ng imbestigasyon ang pulisya sa insidente.