BAGUIO CITY, Philippines — Dalawang estudyante ang patay habang isa pa ang sugatan matapos mahulog ang sinasakyan nilang jeepney sa bangin sa Lower Tomay, Bahong, La Trinidad, Benguet noong Miyerkules ng umaga.
Kinilala ang mga nasawi na sina Rolly Quintino, 24; at Cedric Wasit, 25, habang sugatan ang isa pang pasahero na si Alzimer Anton Menes bunsod ng mga tinamong mga sugat sa iba’t ibang bahagi ng katawan; pawang residente ng Barangay Palew, Tublay, Benguet.
Ayon sa ulat ng Traffic Investigation and Management Enforcement Section ng the La Trinidad Police, nanggaling ang tatlong biktima sa La Trinidad at bumabagtas pauwi sa Barangay Palew, Tublay nang pagdating nila sa bisinidad ng Lower Tomay ay nawalan ng kontrol sa manibela si Wasit na siyang nagsisilbing driver ng nasabing jeep.
Sa bilis ng pangyayari, bumangga ang jeep sa riprap wall at tumama ang jeep sa gilid ng kalsada at tuluy-tuloy na nahulog sa may 10-metrong lalim na bangin.
Mabilsi na sumaklolo ang mga awtoridad at residente sa lugar at nang maiahon ang mga biktima ay agad na isinugod sa Benguet General Hospital (BeGH) subalit idineklarang dead-on-arrival sina Quintino at Wasit.
Matapos malapatan ng lunas, idineklara na nang nasa “stable” condition na si Menes.