SANTA CRUZ, Laguna, Philippines — “Full force” ang mga matataas na opisyal ng Laguna, isa sa “vote rich” na lalawigan sa bansa sa isinagawang campaign grand rally ng UniTeam candidates na dinaluhan ng kanilang libu-libong supporters kahapon.
Pinangunahan ni Partido Demokratiko Pilipino-Lakas ng Bayan (PDP-Laban) stalwart Laguna Gov. Ramil Hernandez ang campaign rally para kina Partido Federal ng Pilipinas (PFP) standard-bearer at dating Senador Ferdinand “Bongbong” Marcos Jr. at running mate na si Davao City Mayor Sara Duterte ng Lakas-Christian Muslim Democrats (CMD) sa Provincial Capitol.
“Akin pong karangalan, na ipakilala sa inyo, President Ferdinand Marcos Jr.,” pahayag ni Hernandez sa entablado para sa libu-libong supporters na sumisigaw ng BBM-Sara.
Halos hindi naman magkamayaw ang mga supportets nang ipakilala rin ang tinaguriang “Agila ng Davao” na si Sara.
Dumalo rin sa event sina Vice Governor Karen Agapay gayundin ang 18 mayors ng Laguna sa pangunguna ni Mayors’ League President Edgar Ramos.
Kabilang rin sa mga dumalo ay sina UniTeam senatorial slate Sherwin Gatchalian, Loren Legarda, Mark Villar, Migz Zubiri, Harry Roque, Herbert Bautista, Jinggoy Estrada, Gregorio Honasan, Dante Marcoleta, Robin Padilla, Gibo Teodoro, at Larry Gadon.
Samantala, nagsagawa rin ng motorcade ang UniTeam mula sa Biñan City patungong Santa Rosa City.
Nauna rito, nag-courtesy call kay Hernandez sina Mayor Duterte at Lakas-CMD President House Majority Leader Martin Romualdez ng First District ng Leyte.