MANILA, Philippines — Nasolo ng isang masuwerteng mananaya mula sa Albay ang ?65 milyong jackpot prize ng Grand Lotto 6/55 na binola ng Philippine Charity Sweepstakes Office (PCSO) kamakalawa ng gabi.
Ayon kay PCSO Vice Chairperson at General Manager Royina Garma, nahulaan ng lucky winner ang six-digit winning combination na 39- 29-09-21-19-20 kaya’t naiuwi nito ang jackpot prize na ?65,991,571.00
Ani Garma, nabili ng lucky winner ang kanyang lucky ticket sa Tabaco City, Albay.
Pinayuhan naman ni Garma ang lucky bettor na upang makubra ang kanyang premyo ay magtungo lamang sa punong tanggapan ng PCSO sa Mandaluyong City at dalhin ang kanyang lucky ticket at dalawang balidong ID.
Ang Grand Lotto 6/55 ay binubola tuwing Lunes, Miyerkules at Sabado.
Nabatid na ito na ang ikaapat na pagkakataon na may naging instant milyonaryo sa lotto games ng PCSO ngayong Enero, 2022.
Noong Enero 6, apat na lucky bettors ang naghati-hati sa ?43 milyong jackpot prize ng Regular Lotto 6/42. Dalawa sa lucky tickets ang nabili sa Makati City; isa sa Guagua, Pampanga; at isa sa Maragondon, Cavite.
Nito namang Enero 14, napanalunan ng mananaya mula sa San Fernando City, La Union ang Ultra Lotto 6/58 jackpot prize na ?70,258,716.80.
Enero 14 din naman nang maging instant multi-millionaire ang isang taga-Sto. Domingo, Nueva Ecija na nagwagi naman ng jackpot prize na ?20,212,102 sa Mega Lotto 6/45.