Bahay sinalpok ng truck: 2 patay, 3 sugatan

BACOLOD CITY, Philippines — Patay ang isang mag-ina matapos salpukin ng isang 10-wheeler truck na puno ng tubo ang kanilang bahay habang tatlo pa ang sugatan kabilang ang dalawang bata sa Brgy. Antipolo sa Pontevedra, Negros Occidental, kahapon.

Kinilala ng pulisya ang mga biktima na sina JR Cordero, 30, na namatay noon din; at kanyang 58-anyos na ina na si Ermie na idine­kla­rang dead-on-arrival sa Don Salvador Benedicto Memorial Hospital sa La Carlota City.

Ayon sa ulat ni P/Capt. Hancel Lumandaz,  acting police chief ng Pontevedra Police, sa Negros Occidental Police Provincial Office, habang binabagtas ng 10-wheeler Isuzu truck na may kargang sugarcane at minamaneho ng isang Henry Salgado Sr, kasama ang 8-anyos na anak na lalaki nang mabangga nito ang road railings hanggang sa tuluy-tuloy na sumalpok sa bahay ng pamilya Cordero na nagresulta sa pagkasawi ni JR at nanay nito.

Nasugatan naman sa insidente ang mag-amang Salgado at isang 12-anyos na kapamilya ng nasawing mag-ina.

Sinabi ng Pontevedra Police, ang dalawang bata ay nagtamo lamang ng bahagyang sugat sa insidente subalit ang driver ng truck na si Salgado Sr. ay nasa kritikal umanong kondisyon.

Ang bahay naman ng mga nasawi ay “totally damaged”, dagdag ng pulisya.