PAGBILAO, Quezon, Philippines — Inilunsad ng pamahalaang bayan ng Pagbilao sa pamamagitan ng Municipal Environment and Natural Resources Office (MENRO) ang programang “plastic palit bigas.”
Layunin ng naturang programa na itaas ang kamalayan sa wastong pamamahala ng “solid waste” at kung paano ito makatutulong sa pangangalaga sa kapaligiran.
Ang isang kilong plastic (gaya ng balat ng shampoo, sabon, sitsirya at iba pang kauri nito) ay maaaring ipagpalit sa isang kilong bigas.
Hindi naman maaaring ipagpalit ang mga sando bag, transparent na plastic at matitigas na plastic gaya naman ng mga laruan, crates at iba pa na kagaya nito.
Ang bawat barangay ay may nakalaang apat na sakong bigas o 200 kilograms, at limitado naman sa limang kilo ang maaaring ipagpalit sa bawat residente.