JOSE PANGANIBAN, Camarines Norte, Philippines — Kapwa nasawi ang dalawang lalaki na sakay ng isang motorsiklo matapos na subukang tumakas at makipagbarilan sa police checkpoint sa kahabaan ng highway ng Purok-4,Brgy.Calero ng bayang ito kamakalawa ng madaling araw.
Kapwa napuruhan ng punglo at agad nasawi ang mga suspek na kinilalang si Paciano Garinga Bandola lll,31,residente ng Brgy.Cadlan,Pili,Camarines Sur at Reynaldo Robin Bandola,29,residente ng 43 N,Brgy.Escopa 1, Project 4,Quezon City.
Sa ulat,alas-12:15 ng madaling araw habang nagsasagawa ng checkpoint ang mga kasapi ng Jose Panganiban Police nang dumating ang mga suspek na lulan ng motorsiklo.
Gayunman,sa halip na tumigil ay pinaharurot ng dalawa ang motorsiklo at pinagbabaril ang mga pulis na maswerteng walang tinamaan.
Humabol at nakipagpalitan nang putok sina Patrolman Wendell Dasco at Patrolman Michael Van Acero dahilan para mapuruhan ang mga suspek at duguang bumulagta.
Nabawi sa mga suspek ang isang Kalibre 45 baril, isang 9mm Sub-Machine Gun at ang gamit na Honda SR 150R motorsiklo at nang kapkapan ay nakuha pa mula sa kanila ang 11-bilang ng malalaking plastic sachet ng shabu na tumitimbang ng 120-gramo at nagkakahalaga ng P576,000.