GUINOBATAN, Albay, Philippines — Isang construction worker ang patay matapos barilin sa ulo ng isa sa hindi nakilalang riding-in-tandem sa Sitio Managay, Purok-5B, Brgy. Mauraro ng bayang ito kahapon ng umaga.
Dead-on-the spot ang biktima na nakilalang si Renato Palmiano Ogayon, 48-anyos, residente ng nasabing lugar.
Sa ulat, pasado alas-5 ng umaga habang nakasakay ng kanyang motorsiklo ang biktima angkas ang kinakasama nito at patungo sana sila sa Ligao City nang pagdating sa lugar ay pinara ng nakaabang na mga suspek na pawang nakasuot ng jacket at helmet lulan ng hindi naplakahang motorsiklo.
Pagtigil ng biktima, walang kaabog-abog siyang binaril sa sentido ng isa sa suspek kung saan tumagos pa ang punglo sa kabilang panga nito.
Bumulagta sa kalsada ang biktima habang hindi naman sinaktan ang kinakasama nito na halos natulala dahil sa takot.
Tumakas ang mga suspek patungo sa direksyon ng sentro ng bayan habang narekober sa lugar ang isang basyo ng bala ng kalibre 45 baril.
Isa sa anggulong tinututukan sa imbestigasyon ay ang kinasasangkutang kaso na attempted homicide ng biktima.