MANILA, Philippines — Dahil sa sobrang selos, pinagsasaksak hanggang sa mapatay ng isang mister ang kanyang live-in partner nang malamang may ka-chat ang huli na Chinese noong Biyernes ng gabi sa Mandaue City.
Dead-on-the-spot si Hazel Haynar, 41-anyos, habang nadakip ng mga pulis ang kinakasama nitong si Jun Villodo Manata, 51; kapwa nakatira sa Semense B, Barangay Tipolo, Subangdaku ng nasabing lungsod.
Sa report ng Subangdaku Police, ala-1:00 ng madaling araw nang maganap ang krimen sa loob ng kuwarto ng mag-live in partner sa nasabing lugar.
Lumabas na araw-araw na lamang umanong nagtatalo sina Haynar at Manata dahil sa matinding selos ng huli sa hinalang may ibang lalaking kinalolokohan ang kinakasama bukod pa sa mga ka-chat nito sa social media.
Sa kabila nito, inamin ng biktima kay Manata na may ka-chat siyang isang Chinese national pero matagal na umano iyon at hindi naman sila nagkikita.
Dito na nagpanting ang tenga ni Manata hanggang sa kinuha nito ang patalim na may 15-pulgada ang haba at pinagsasaksak sa dibdib si Haynar na naging sanhi ng agaran nitong kamatayan.
Matapos ang krimen nadakip ng mga rumespondeng pulis si Manata at nahaharap sa kasong pagpatay.