‘Cable man’ timbog sa P700K marijuana
SANTIAGO CITY, Isabela, Philippines — Isang empleyado ng telecommunication ang nahulog sa bitag ng pulisya matapos madakip sa ikinasang buy-bust operation sa Purok 2, Barangay Calaocan sa lungsod na ito kamakalawa ng hapon.
Kinilala ng Santiago City PNP ang nadakip na suspek na si Narciso Buen Jr., 24, ladderman ng isang telecommunication at residente ng Barangay Divisoria sa nasabing lungsod.
Nagpanggap na buyer ang isang kagawad ng pulisya sa inilatag na buy-bust operation ng pinagsanib na puwersa ng Philippine Drug Enforcement Agency (PDEA), Quirino Police Office, Regional Intelligence Unit at Santiago City Station 1 police na nagresulta sa pagkadakip ng suspek dakong alas-2:30 ng hapon.
Nakumpiska sa pag-iingat ng suspek ang 4 na bricks, 1-rectangular form na box at isang malaking plastic sachet na naglalaman ng pinatuyong dahon ng marijuana at mga marijuana seeds na tumitimbang ng 6 kilos at tinatayang may market value na P720,000.00.
Nabawi rin ang buy-bust money, cellphone at isang motorsiklo na walang plaka na ginamit ng suspek sa transaksyon.
- Latest
