MINALABAC, Camarines Sur, Philippines — Wakwak ang tiyan at agad nasawi ang isang 15-anyos na binatilyo matapos na pagsasaksakin ng kapwa menor-de-edad na suspek sa Brgy. Hamoraon ng bayang ito kamakalawa ng gabi.
Lumuwa ang bituka sa laki ng sugat sa tiyan dahil sa saksak ang agad ikinamatay ng biktimang si Darwin Cortez Dotillos, residente ng Brgy.Bagoladio, Bula habang sinampahan na ng kasong pagpatay ang suspek na itinago sa pangalang “Noel”, 15-anyos, ng Zone-5, Sitio Pag-asa, Brgy. Salingogon.
Sa ulat, dakong alas-7:30 ng gabi sa hindi pa malamang dahilan ay walang kaabug-abog na pinagsasaksak ni Noel ang biktima sa tiyan.
Mabilis na sinaklolohan ng mga residente ang biktima at tinalian ang malaking sugat nito sa tiyan makaraang makitang lumuwa ang lamanloob nito saka sinubukang dalhin sa hospital pero punerarya ang binagsakan makaraang masawi.
Agad na naaresto ang suspek ng mga rumespondeng pulis.