TUGUEGARAO CITY, Cagayan, Philippines — Dalawang umano’y dayong tulak ng droga ang napatay matapos manlaban sa awtoridad sa isinagawang buy-bust operation sa Brgy. Salvacion 2nd, Lupao, Nueva Ecija noong Huwebes.
Kinilala ni Nueva Ecija Police director Colonel Jaime Santos ang mga nasawi na sina Michael Romero na taga-Brgy. Caputican, Talavera at isang alyas “Fred” na umano’y naunang kumasa ng barilan nang mapunang mga pulis pala ang kanilang katransaksyon.
Narekober sa mga nasawi ang 18 sachet ng shabu na may timbang na 2.5 gramo at nagkakahalaga ng P18,000; dalawang cal.38 revolver na paltik at traysikel na gamit ng mga nauna sa pagdedeliber ng droga.
Samantala, nadakip din ang apat pang tulak mula sa magkahiwalay na buy-bust operation sa Talavera, Jaen, Licab at isa pa sa Lupao. Nasamsam dito ang shabu at marijuana na may pinagsamang halaga na P8,000.