SANTIAGO CITY, Isabela, Philippines — Isa ang patay habang nasa malubhang kalagayan ang dalawang iba pa matapos sumalpok ang kanilang sinasakyang motorsiklo sa kasalubong na isang pickup truck sa Brgy. District 2, Benito Soliven ng lalawigang ito, kamakalawa ng hapon.
Kinilala ang nasawing biktima na si James Agustin, 35, habang nasa kritikal na kalagayan sina Randy Mansibang, 39, at John Mansibang, 31, kapwa empleyado ng isang agricultural supply firm at residente ng Barangay District 1 sa nabanggit na bayan.
Lumalabas na umagaw ng linya sa kalsada sa may Brgy. District 2 ang motorsiklong minamaneho ni Agustin sakay ang dalawang iba pang biktima kung kaya’t sumalpok ito sa kasalubong na isang silver na pick-up (NED1715) na minamaneho ni Jaime Suguitan, 81, ng Brgy. San Carlos, Benito Soliven.
Mabilis na isinugod sa pagamutan ang tatlong biktima subalit idineklarang dead-on-arrival si Agustin habang kahapon ay hindi pa nagkakamalay ang dalawa nitong kasama.
Nakainom ng alak ang mga biktima nang mangyari ang insidente.
Sumuko naman ang driver ng pick-up na masuwerteng hindi nagtamo ng malubhang sugat matapos sumalpok din ang kanyang SUV sa isang bakal na poste sa gilid ng kalsada.