MANILA, Philippines — Nanawagan kahapon si San Jose Del Monte City Rep. Florida “Rida” Robes sa Inter-Agency Task Force on the Management of Emerging Infectious Disease (IATF) na magsagawa ng malawakang information campaign ukol sa magkakaibang COVID-19 vaccines.
Ang pahayag ni Robes ay ginawa sa layuning maibsan ang pangamba at mabawasan ang maraming katanungan kaugnay sa kaligtasan at epektibo ng iba’t ibang bakuna na kasalukuyang ibinibigay sa ibang bansa.
“There is too much information that our countrymen are getting confused and anxious about getting the vaccine. The government, particularly the IATF, should go on a massive information drive to give the real score on the vaccines and the vaccination program that soon will be rolled out when we have the vaccines,” ayon kay Robes.
Si Robes, chairman ng House Committee on People’s Participation, ay nakipag-ugnayan sa mga international pharmaceutical companies na nangunguna sa paggawa ng bakuna kasama ang Philippine health officials para mapabilis na mapangasiwaan ang pag-apruba sa COVID-19 vaccine sa Pilipinas.
Tinukoy ni Robes na nakausap niya ang maraming mga tao sa kanyang distrito na nagpahayag ng kanilang pangamba sa pagkuha ng bakuna dahil sa mga katanungan sa kanilang kaligtasan at pagiging epektibo nito.
Nagpahayag din ng kumiyansa kongresista na pipiliin ng Duterte administration ang bakuna na napatunayang ligtas at epektibo.