2 tiklo sa P.3 milyong shabu at baril
LUCENA CITY, Philippines — Nalambat ng pinagsanib na mga operatiba ng Quezon at Lucena Police-Drug Enforcement Unit ang dalawang kilabot na tulak ng ipinagbabawal na droga na nakumpiskahan ng mahigit P.3-milyong halaga ng hinihinalang shabu at baril sa isinagawang operasyon sa Purok Narra, Barangay 9, dito, kahapon ng madaling araw.
Sa ulat ni Quezon Provincial Police Office director P/Col. Erickson Dilag, kinilala ang mga nadakip aysina Armando Table alyas “Manding”, 45, at Jofren De Rosas, 38; kapwa residente ng Purok Damayan 1, Brgy. Ibabang Iyam.
Ayon kina P/Lt.Col.Romulo Albacea at Maj.Gaylor Pagala, naging positibo ang pakikipagtransaksyon ng mga suspek sa poseur buyer na pulis sa pamamagitan ng cellphone kung kaya’t isinagawa ang buy-bust operation dakong alas-12:30 ng madaling araw.
Nakuha buhat sa pag-iingat ng mga suspek ang 16 gramo ng shabu na nagkakahalaga ng P328,400, isang piraso ng P1,000 marked money, 11 piraso ng P1,000 budol money, isang baril na de-sabog na may anim na bala at motorsiklo na kanilang sinakyan.
Sinabi ng mga suspek na sa lalawigan ng Cavite sila kumukuha ng droga at ibinebenta sa Lucena City.
- Latest