Bangayan sa ‘recount’ tinuldukan ng DILG
CABANATUAN CITY, Nueva Ecija, Philippines — Bumaba na sa puwesto si Jaen, Nueva Ecija Mayor Sylvia Austria noong Lunes ng gabi, isang araw matapos ang naganap na pagsabog malapit sa munisipyo sa gitna ng girian nila sa puwesto ng katunggaling si Antonio Prospero Esquivel.
“Bilang pagtalima sa kautusan ng Department of Interior and Local Government (DILG) at ng hukuman, ako ay pansamantalang bababa sa puwesto bilang punong bayan,” mensahe ni Austria sa kanyang post sa Facebook.
Ito umano ay para mapanatili ang katahimikan sa bayan na halos isang linggo nang may tensyon sa pagitan ng mga supporters ng dalawang nagbabangayang kampo.
Nabatid na dumating ang mga opisyal ng DILG-Central Luzon at Nueva Ecija sa bayan ng Jaen noong Lunes ng hapon upang opisyal na iluklok si Esquivel matapos manalo sa “recount” at sinasabing nag-opisina sa Municipal Treasurer’s Office sa unang palapag ng munisipyo noon pang Huwebes ng gabi makaraang paboran ng Gapan RTC Branch 87 ang kanyang election protest laban kay Austria.
Sa kabila nito, sinabi ni Austria na gagawin niya ang lahat ng hakbang upang ang tunay na hustisya at boses ng Jaen ang mangibabaw. Nagpasalamat din siya sa mga dasal, pagtangkilik at suporta ng kanyang mga kababayan.
Nauna rito, Linggo ng hapon nang sumiklab ang isang pagsabog na nagpapala sa tensyon sa Jaen at kinailangang magpadala ang pulisya ng dagdag na puwersa na magbabantay at magpapanatili ng kapayapaan sa nasabing bayan.