1,664 paaralan sa Cagayan Valley nasira kay ‘Ulysses’
SANTIAGO CITY, Isabela, Philippines — Nasa 1,664 na paaralan sa buong Cagayan Valley (Region 2) ang nasira at naapektuhan sa pananalasa ng nagdaang bagyong Ulysses, ayon sa Department of Education (DepEd)-Region 2 kahapon.
Sinabi ni Dr. Amir Mateo Aquino, information officer ng DepEd-Region 2, walo nilang Schools Division Offices sa buong rehiyon ang apektado sa hagupit ng bagyo. Karamihan sa mga tinamaan ng pagbaha ay ang mga paaralan sa lalawigan ng Cagayan na nalubog sa tubig.
Umabot din sa 2,856 na mga teaching at non-teaching personnel ang naapektuhan dahil sa matinding pagbaha bunsod ng bagyong Ulysses.
Naitala rin na tatlong mag-aaral ang nasawi sa landslide na kinilalang sina Julie Ann Taniza, Grade 9 ng Runruno, Quezon, Nueva Vizcaya; King Jim Bragasin, Grade 11, Frank Jay Pagulayan, Grade 12, kapwa mag-aaral ng Baggao National High School sa Baggao, Cagayan at John Bryce Magunddayao, Grade 5 ng Nassipping Elementary School sa lalawigan din ng Cagayan na nasawi naman sa pagkalunod.
Ayon kay Aquino, hindi pa man natatapos ang isinasagawang imbentaryo at assessment ng DepEd-Region 2 ay umabot na rin sa P91 milyon ang halaga ng pinsala sa mga paaralan at kagamitan dahil sa bagyo.
Bukod sa mga gusali, silid-aralan ay pinakamarami ang nasirang mga gadgets tulad ng mga computers, laptop, printers, learning materials, teaching kits at mga modules ng mga mag-aaral na winasak ng malawakang pagbaha.
Sa kasagsagan ng bagyo, nagsilbing evacuation centers ang may 294 na paaralan na nasa ligtas at mataas na lugar para sa mga pamilyang nawalan ng mga tahanan.
Sa kasalukuyan ay nagpapatuloy sa pag-iikot ang pamunuan ng DepEd-Region 2 para mamahagi ng relief assistance sa mga apektadong guro, mag-aaral at iba pang kawani ng DepEd na apektado sa pananalasa ng bagyo.
- Latest