Mag-asawang guro sumalpok sa truck, patay
Papasok sa iskul para sa teaching modules
TUGUEGARAO CITY, Cagayan , Philippines — Patay ang isang mag-asawang guro matapos makipagsalpukan ang kanilang motorsiklo sa rumaragasang truck habang patungo sa pinapasukang pampublikong paaralan sa highway ng Barangay Mataguisi, Pudtol, Apayao noong Biyernes.
Kinilala ang mga nasawi na sina Mark Abad Ventura, 29-anyos, at misis na si Jaysa, 27 na kapwa nasawi habang ginagamot sa ospital.
Sa report ng pulisya, naganap ang salpukan ng dalawang sasakyan sa kurbadang bahagi ng highway dakong alas-8:00 ng umaga. Ang lugar ng aksidente ay ilang metro na lang ang layo sa Mataguisi Comprehensive National High School kung saan patungo sa trabaho ang mag-asawang Ventura. Nakasuot pa umano ng raincoat ang dalawa at madulas ang kalsada dulot ng malakas na buhos ng ulan nang maganap ang trahedya.
Bagama’t wala namang face-to-face classes, sinasabing nagre-report ang mag-asawa sa paaralan upang sundan ang kalagayan ng kanilang pinamumudmod na teaching modules.
Naunang nalagutan ng hininga si Mark habang ginagamot sa ospital habang kinailangang ilipat ang misis na si Jaysa sa Cagayan Valley Medical Center dahil sa maselang kalagayan pero hindi na rin nagtagal ang kanyang buhay.
Sumuko naman sa awtoridad ang drayber ng trak na si Reynaldo Maruquin, 39, na taga Sta. Marcela, Apayao.
- Latest