TUGUEGARAO CITY, Philippines — Anim na miyembro ng pamilya ng mag-asawang kawani ng Department of Education (DepEd) at Department of Agrarian Reform (DAR) ang tinamaan ng COVID-19 sa lungsod na ito kamakalawa.
Tinukoy ng awtoridad na sanhi ng “workplace transmission” ang pangyayari.
Sa report ng Cagayan Provincial Health Office (PHO), nagkaroon ng exposure ang mag-amang kawani ng DAR sa kanilang mga kliyente at naipasa ang virus sa kanilang pamilya kabilang ang ina na namamasukan bilang administrative assistant sa DepEd.
Sa report ng PHO, nawalan ng panlasa, pang amoy, panlalabo ng paningin ang mga nagpositibong miyembro ng pamilya kasabay ng pagkakaroon ng lagnat at ubo.
Ang buong pamilya ay naka-home quarantine na, ayon sa PHO.
Dahil dito, hinikayat ni Cagayan Gov. Manuel Mamba ang mga kapwa public officers na iwasan muna ang nakasanayang pag-papakape sa mga dumadalaw na bisita upang maibsan ang pagkalat ng COVID-19. Aniya, peligroso ang sitwasyon dahil kinakailangang magtanggal ng face mask ang nagkakape upang humigop habang nakikipagtalaktakan.
Ayon sa gobernador, makabubuti ring iwasan ng mga opisina ang gumamit ng aircon sapagkat malaki ang posibilidad na lumutang lamang ang virus sa loob ng kulong na espasyo.