MANILA, Philippines — Isang negosyante at dalawang pamangkin ang patay nang sumalpok ang kanilang sinasakyang sports car sa isang 10-wheeler truck na may kargang tubo sa Bacolod City kamakalawa ng madaling araw.
Dead-on-the-spot ang mga biktimang sina Stanley Flores, negosyante at mga pamangking sina Welton at Mark John Porcel; pawang ng Brgy. Villamonte ng nasabing lungsod habang nasa kustodya na ng pulisya ang truck driver na si Michael Mojica, 42, ng Kabankalan City, Negros Occidental.
Sa ulat ni Major Charles Gever, hepe ng Bacolod City Police Station 4, dakong ala-1:00 ng madaling-araw, lulan ng sports car na Ford Mustang ang mga biktima na minamaneho ni Flores at mabilis na tinatahak ang kahabaan ng Circumferencial Road sa Brgy. Villamonte nang maganap ang trahedya.
Sa sobrang bilis ng patakbo sa sports car, hindi napansin ni Flores ang truck sa kanyang unahan kaya hindi nito nakontrol ang manibela. Agad sumalpok ang sports car sa likurang bahagi ng trak at pumailalim pa ang kotse dito dahilan ng pagkaipit at pagkadurog ng mga biktima.