TUGUEGARAO CITY, Cagayan, Philippines — Nasawi ang isang 27-anyos na obrero habang malubhang nasugatan ang dalawa pang tao nang tumaob ang sinasakyan nilang jeepney na may kargang hollow blocks sa Brgy. Rosario, Sigay, Ilocos Sur kamakalawa.
Kinilala ng pulisya ang nasawi na si Benil Oppin habang nagpapagaling sa Ilocos Sur District Hospital sina Robert Dingoasan, 56 at drayber na si Jessie Bayaten, 43.
Ayon sa report, nabitin ang sasakyan sa paakyat na bahagi ng kalsada dahil sa bigat ng sakay nitong mga hollow blocks dakong alas-12:20 ng tanghali. Dito, nawalan ng kontrol si Bayaten sa jeepney na mabilis umatras saka bumaliktad.
Sa kasawiang palad, nabagsakan si Oppin ng mga kargang hollow blocks na sanhi ng kanyang agarang kamatayan.