Transport leader, Bayan chair inaresto sa pagpatay
LEGAZPI CITY, Albay, Philippines — Magkasunod na inaresto ng pulisya ang isang mataas na opisyal ng transport group na Piston sa Bicol Region at chairperson ng Bagong Alyansang Makabayan (Bayan)-Camarines Sur dahil sa mga kasong pagpatay, iniulat ng pulisya kahapon.
Kinilala ang isang suspek na si Ramon Abrique Rescovilla, 53-anyos, secretary general ng Concerned Drivers Operators o Condor-Piston sa Bicol. Siya ay nahuli sa kanyang bahay sa Purok-1, Brgy. Kilicao, Daraga, Albay kamakalawa ng hapon.
Sa ulat, dakong alas-3:20 ng hapon sa bisa ng warrant of arrest dahil sa kasong murder na inilabas ni Judge Ariel Dating ng Regional Trial Court Branch 64 sa Labo, Camarines Norte, sinalakay ng mga kasapi ng 96th Military Intelligence Company, 9th Military Intelligence Batallion, 903rd Infantry Brigade ng Philippine Army, Regional Police Mobile Force Batallion, Provincial Intelligence Unit, Police Regional Office 5-Regional Intelligence Unit at Albay Police sa kanyang bahay si Rescovilla.
Nakuha sa suspek ang isang pink sling bag na may lamang kalibre 45 baril, mga bala at isang granada.
Nauna rito, bumagsak din sa kamay ng mga awtoridad sa kanilang opisina sa Naga City noong Linggo ng alas-9:30 ng gabi si Nelsy Rodriguez, chairperson ng Bayan sa Camarines Sur dahil sa kaso umano ng pagpatay.
Binatikos naman ni Dan Balucio, secretary general ng Bayan sa rehiyon ang magkasunod na pag-aresto kina Rodriguez at Rescovilla dahil sa kawalan umano ng due process. Hindi man lang umano nakatanggap ng subpoena mula sa provincial prosecutor’s office ang dalawang opisyal, walang preliminary investigation at ni hindi nakapagsumite ng counter affidavit ang dalawa.
Ayon kay Balucio, bahagi umano ito ng pag-atake sa mga mass leaders sa bansa sa ilalim ng Anti-Terorrism Act of 2020 at sa Executive Order (EO) 70 ng administrasyong Duterte.
- Latest
