SANTIAGO CITY, Isabela, Philippines — Nasa P3.2 milyong halaga ng marijuana plants ang nasamsam at winasak matapos na madiskubre muli ng mga awtoridad sa isang plantasyon sa Kalinga, ayon sa ulat kahapon.
Sa ulat, nasa 1,600 square meters ang nadiskubreng plantasyon kung saan humigit kumulang sa 16,000 na fully grown marijuana plants ang kanilang binunot at sinunog sa Brgy. Loccong, Tinglayan.
Ang operasyon ay bahagi ng mas pinaigting na “Oplan 11 Lima Lawing” (MJ Eradication Operation) na isinagawa ng pinagsanib na puwersa ng Kalinga Police Office, PDEA-Cordillera at Cagayan Valley, Kalinga Provincial Mobile Force Company at Tinglayan Police na nagresulta sa dalawang araw na pagwasak sa nasabing plantasyon.
Samantala, sinabi ni P/Col. Davy Vicente Limmong, police director ng Kalinga na magpapatuloy ang kanilang isasagawang pagdiskubre sa iba pang mga plantasyon para tuluyang mawasak ang mga ito.