Sekyu itinumba ng tandem
NORTH COTABATO, Philippines — Bumulagta ang isang security guard matapos pagbabarilin ng riding-in-tandem habang nagmamaneho ng kanyang motorsiklo sa Daproza Avenue, Brgy. Dadiangas North, General Santos City kahapon ng umaga.
Kinilala ni Police Captain Abdulsalam Mamalinta, hepe ng Police Station 1 ng General Santos City Police Office ang biktima na si Miranda Lintang Tago, 46-anyos at residente ng Purok 13 Lanton, Barangay Apopong.
Sa imbestigasyon, alas-10:30 ng umaga habang binabagtas ng biktima ang nabanggit na lugar nang bigla na lamang tabihan ng dalawang suspek na magka-angkas sa motorsiklo at pinagbabaril. Nagtamo ng tama ng bala sa ulo ang biktima na siyang dahilan ng kaniyang agarang pagkasawi.
Ayon sa mga testigo, sakay ng kulay itim na Yamaha Sniper 150 ang mga suspek at nakasuot ng black hoody jacket kung saan may namataan din umanong isa pang motorsiklo na kanilang posibleng “lookout”.
Ayon naman kay Mamalinta, ang biktima ay kabilang umano sa 1st Level ng drug watchlist ng PNP kung saan tinitingnan na rin ng kapulisan ang anggulong may kaugnayan sa iligal na droga.
- Latest