Misis napraning sa lockdown nagbasag ng santo, inaresto
TUGUEGARAO CITY, Cagayan, Philippines — Humantong sa pagbabasag ng imahe ni Mama Mary ang pagkapraning ng isang 30-anyos na misis na iniwang naghihirap ng kanyang kinakasama sa gitna ng lockdown ng Luzon dahil sa bantang pagkalat ng COVID-19 sa loob ng munisipyo ng Sta. Lucia, Ilocos Sur noong Martes.
Sa report ng pulisya, kinompronta ni Jeneveve Lucero, 30, tubong Surigao City si Leonora Menggoy ng DSWD Sta. Lucia dahil umano sa kawalan ng aksyon sa kanyang reklamo laban sa kinakasama na umano’y umabandona sa kanya ngayong inatasan na ng gobyernong manatili sa loob ng bahay ang mga mamamayan.
Dahil sa matinding galit na namuo sa dibdib ay parang bulkang sumabog ang ngitngit ni Lucero nang sunggaban nito ang imahe ng santa sa tanggapan ng DSWD saka ibinagsak sa sahig at dinurog sa pamamagitan ng pagtapak sa harapan ni Menggoy at iba pang kawani.
Agad namang inaresto ng nagrespondeng pulis si Lucero na dinala sa Sta. Lucia District Hospital para malaman ang kanyang kalagayan sa kalusugan kung mayroon siyang sintomas ng COVID-19 saka siya kinasuhan ng alarm and scandal.
- Latest