Mag-live-in partner minasaker!
MANILA, Philippines — Tadtad ng bala sa katawan at patay na nang matagpuan ang isang mag-live-in partner makaraan silang pasukin sa inuupahang apartment at pagbabarilin ng hindi pa nakilalang mga armadong salarin sa naganap na masaker sa Brgy. Santol, Tanza, Cavite nitong Lunes ng hapon.
Kapwa dead-on-the-spot ang mga biktima na kinilalang sina Amante Ronquillo at Ma. Jesusa Torcuator; kapwa 48- anyos sanhi ng mga tama ng bala sa iba’t ibang bahagi ng kanilang katawan.
Sa ulat ni Cavite Provincial Police Office (PPO) Director P/Col. Marlon Santos, alas-2:30 ng hapon nang mangyari ang insidente sa loob ng apartment ng maglive-in partner sa nasabing lugar.
Sa pahayag ng isang testigo, dumating sa lugar ang mga armadong salarin na agad pinasok ang tahanan ng mga biktima. Ilang saglit pa ay sunud-sunod na putok ang umalingawngaw na tuluyang tumapos sa buhay ng maglive-in partner na kapwa duguang bumulagta sa insidente.
Ang mga suspect ay nagmamadaling tumakas sa lugar na hindi naman nagawang harangin ng mga kapitbahay ng mga biktima dahil pawang armado.
Nabatid na apat na araw pa lamang nakatira sa lugar ang dalawa matapos na rentahan ang nasabing apartment.
Narekober sa crime scene ang sari-saring identification (ID) ng maglive-in partner na iba-iba ang ginamit na pangalan pero iisa lamang ang larawan. Sinisiyasat pa ng mga awtoridad ang motibo sa pagpatay. Cristina Timbang
- Latest
