Mag-asawang retirado, kinatay sa bahay
NORTH COTABATO, Philippines — Naliligo sa sarili nilang dugo at patay na ang mag-asawang retirado nang matagpuan sa loob ng kanilang bahay matapos na pasukin at pagsasaksakin ng ‘di kilalang mga salarin sa Purok Maligaya, Brgy. Magsaysay, Koronadal City, kahapon ng umaga.
Kinilala ang mag-asawa na sina Arturo Aquino, 68-anyos, isang retired military man at asawang si Erlinda, 75, isang retired midwife.
Batay sa ulat ng pulisya, alas-10:00 ng umaga nang madiskubre ng kanilang driver boy ang krimen nang kukuha sana siya ng inuming tubig sa loob ng bahay ng mag-asawa. Bukas na umano ang pinto ng bahay at bumungad na lamang sa kanya ang duguang bangkay ng mga biktima.
Sa ulat, kapwa pinagtataga ang mga biktima matapos silang pasukin. Gayunman, hindi umano nawala ang mga importanteng gamit ng mag-asawa sa bahay ngunit hinalungkat umano ang kanilang mga kagamitan.
Nabatid na malayo rin sa ibang kabahayan ang tahanan ng mga biktima dahilan kung bakit walang nakapansin sa krimen.
- Latest
