PANGASINAN, Philippines — Isang binatilyo ang nasawi nang mahulog sa bangin habang nagbibisikleta sa Daang Kalikasan sa Barangay Muelang, bayan ng Mangatarem kamakalawa.
Kinilala ng Pangasinan Police Office ang biktima na si John Marbert Capito, 16-anyos, Grade 11 student at residente ng Dagupan City. Sa paunang pagsisiyasat, binabagtas ng binatilyo ang natu-rang kalsada sa bulubunduking lugar ng bayan at nang sumapit sa matarik na bahagi ay nawalan ng preno ang kanyang bisikleta sanhi upang mawalan ng kontrol sa manibela at dire-diretso sa bangin.
Isinugod pa ang biktima sa isang pagamutan subalit idineklara ng dead-on-arrival. Bunsod sa aksidente, pansamantalang isinara sa publiko mula kahapon ang naturang daan.