Motor vs van: Rider tigok, angkas grabe
CAVITE, Philippines — Patay ang rider ng motorsiklo habang kritikal ang angkas nito matapos na makasalpukan ang isang van habang kapwa bumabagtas sa kahabaan ng Molino-Paliparan Road, Brgy. Salawag, Dasmariñas City kahapon ng madaling araw.
Kinilala ni Plt Col Nerwin Ricohermoso ang namatay na biktima na si Virgilio Felipe Jr., 26-anyos, residente ng Blk. 10, Lot 19, Acura St., Greenpoint Homes, Mambog 4, Bacoor City habang kritikal ang backrider nito na tumilapon sa insidente na si Benjamin Roldan, 32-anyos, ng Blk. 12, Lot 22, Greenpoint Homes Subd., Mambog 4, Bacoor City.
Hawak na ng pulisya ang driver ng Lite Ace van na si David Mambanon Jr , 45, ng Blk. 24, Lot 17, Teacher’s Village, Brgy. San Gabriel, GMA, Cavite.
Sa ulat, alas-5:00 ng madaling araw habang binabagtas ng mga biktima lulan ng Honda Click motorcycle na walang plaka ang nasabing kalsada nang tumbukin sila ng kasalubong na van (PTT-151) ni Mambanon. Parehong mabilis ang patakbo ng dalawang sasakyan at nang mapadaan na sa pakurbang kalsada ay dito na kapwa hindi nakapagmenor na naging sanhi ng salpukan.
Sa lakas ng impact, kapwa tumilapon ang mga biktima na ikinasawi ng driver ng motorsiklo.
Nakakulong na ang driver ng van na nahaharap sa kasong kriminal.
- Latest