Kawani ng DPWH nilikida

MANILA, Philippines — Patay ang isang emple­yado ng Department of Public Works and Highways (DPWH) nang barilin ng ‘di pa nakikilalang suspek sa Virgo Subdivision, Brgy. Rosary Heights 9, Cotabato City noong Linggo ng gabi. Sa report ng City Police, nakilala ang biktima na si Michael Macion Laranjo, 45-anyos, may asawa, residente sa nasabing lugar.

Sa paunang imbestigasyon, pauwi na sana si Laranjo pasado alas-9:00 ng gabi nang lapitan ng nag-iisang suspek at biglang binaril ng cal. 45 pistol sa ulo.

Mabilis namang tumakas ang salarin sakay sa isang motorsiklo matapos isagawa ang krimen. Inaalam pa ng mga otoridad ang posibleng motibo sa pagpatay at kung sino ang nasa likod nito.