Parak binundol ng rider na tumakas sa checkpoint

TUGUEGARAO CITY, Cagayan  , Philippines  —  Malub­hang nasugatan ang isang pulis matapos tum­bukin ng tumatakas na rider na kanilang sisitahin sana sa isang checkpoint sa Enrile Boulevard, Brgy. Carig Sur ng lungsod na ito kamakalawa.

Nagkabali-bali ang buto at nagtamo ng pasa sa katawan si P/Master Sergeant Napoleon Tabbu ng City Police Station dahil sa insidente.

Sa report kay City Chief of Police Lt. Colonel George Cablarda, sa halip na tumabi ay pinaharurot ni Ryan Danguilan, 21, ang mi­namanehong motorsiklo nito upang hindi ito masita sa kawalan ng suot na helmet.

Nabatid na tumila­pon ng ilang metro si Tabbu nang tumbukin ni Danguilan matapos siyang tangkaing harangin ng una.

Isinugod sa Cagayan Valley Medical Center ang sugatang pulis habang nasukol ng mga kabaro si Danguilan na nadiskubreng walang mga driver’s license at rehistro ang dalang motorsiklo.