Misis na tinangay ng alon, nasagip sa Babuyan Channel
TUGUEGARAO CITY, Cagayan , Philippines — Himalang nakaligtas ang 42-anyos na misis na napaulat na casualty sa nagdaang pananalasa ni bagyong “Falcon” noong Huwebes matapos matagpuang buhay habang lulutang-lutang sa Babuyan Channel noong Biyernes.
Sa report na ipinalabas ni Major Sharon Malillin, tagapagsalita ng Cagayan Police Office, dakong alas-10:00 ng umaga naispatan at sinagip ng mga mangingisda si Judith Berbano na nakakapit sa kahoy na kanilang unang dinampot upang gawing panggatong ng mister na si James.
Matatandaan na tinangay at sinira ng dumadagundong na alon ng Cagayan River ang bangka ng mag-asawa habang namumulot ng panggatong.
Napadpad subalit naghiwalay ang mag-asawa sa karagatan na patuloy inilayo ng malalakas na alon hanggang sa unang nasagip ng mga mangingisda si James habang patuloy na nawawala si Judith.
Kaagad na niyakap at hinagkan ni James si Judith matapos ang dalawa nitong gabing pagtangis at pangungulila sa misis nang muli silang magkita sa Abulug Rural Health Center.
- Latest