MANILA, Philippines — Dalawang pulis ang ipinasok sa selda ng kanilang kabaro matapos maaresto sa isang entrapment operation na ikinasa ng PNP-Counter Intelligence Task Force (CITF) laban sa kanila dahil sa pangingikil umano sa mga suspek sa kanilang inaresto sa bayan ng Wao, Lanao del Sur, kamakalawa.
Himas-rehas ngayon sina Police Staff Sergeant Jeffrey Romero Fabros at Police Master Sergeant Erwin Piquero.
Ayon sa ulat, inaresto ang dalawa sa aktong tinatanggap ang P50,000 marked money mula sa complainant.
Ayon sa nagrereklamong si Laut Madale, naaresto ang kanyang anak nina Piquero nang salakayin ang kanilang bahay nang walang search warrant noong Mayo 17, 2019 para sa kasong illegal possession of firearms at nakuhanan ng isang .45 kalibre na baril.
Hiningan umano si Madale nina Piquero ng P200,000.00 kapalit ng kalayaan ng kanyang anak at mapababa ang kaso.
Sinabi pa ni Madale na nakapagbigay na siya ng P100,000.00 at pinalabas ang anak. At may balanse pa silang P100,000.00 na bumaba sa P50,000.00.
Dahilan para magsumbong si Madale sa CITF at dito na ikinasa ang operasyon laban sa dalawa na nagresulta sa pagkakadakip sa mga ito.