LIPA, Batangas , Philippines — Naaresto na ng mga awtoridad ang suspek sa rape-slay ng De La Salle-Lipa student sa isang police operation sa Oriental Mindoro, Martes ng hapon.
Kinilala ni Lt. Col. Ramon Balauag, Lipa police chief ang suspek na si Jorge Benedicto, security guard ng Healthy BSS Security Agency na nakatalaga sa Miracke Heights Subdivision, Brgy. Antipolo Del Norte, Lipa City at kasalukuyang nakakulong sa Lipa Police Station habang inihahanda ang kaso laban dito.
Si Benedicto ay ang itinuturong pumatay at nanggahasa kay Fidex Therese Maranan, 21-anyos, 4th year college student ng De La Salle University sa Lipa.
Natagpuang patay si Maranan sa loob ng kanyang tinutuluyang bahay sa nasabing subdivision na may saksak sa leeg at sugat sa ulo noong May 17 bandang alas-3:30 ng hapon.
Nasakote si Benedicto sa Brgy. Calapan Victoria Oriental Mindoro ng pinagsanib na elemento ng Victoria at Lipa Police noong May 21 bandang alas-5:10 ng hapon.
Gayunman, tumanggi pang idetalye ni Batangas Police Director Col. Edwin Quilates ang pagkakaaresto kay Benedicto habang inihahanda ang pormal na pagsasampa ng kaso sa korte.