Mister nanakal ng misis, binoga ng ama
TUGUEGARAO CITY, Cagayan , Philippines — Nakikipagbuno kay kamatayan ang isang 23-anyos na senglot na mister matapos barilin ng sariling ama na nabigong umawat sa kanyang pagwawala at pananakal sa sariling misis sa kanilang bahay sa Brgy. Cabalangegan, Vigan City, Ilocos Sur kahapon.
Sa report ng pulisya, umuwing lango sa alak si Mark John Peros saka inaway ang misis hanggang sunggaban na nito ang leeg at sakalin sa harapan ng kanyang ama na si Juanito Peros, 51, dakong alas-2:45 ng madaling araw.
Sinubukang awatin ng nakatatandang Peros ang anak pero patuloy ang pagsakal ng huli sa kanyang misis.
Dahil dito, kinuha ni Juanito ang itinatago niyang cal. 38 paltik at binaril nito ang anak na si Mark John. Isinugod ng mga sumaklolo ang biktima sa Gabriela Silang General Hospital habang sumuko sa mga nagrespondeng pulis ang suspek ngunit wala na ang ginamit nitong baril.
- Latest
