3 ‘drug trafficker’ huli sa P13.6-M shabu
MANILA, Philippines — Tatlong pinaghihinalaang bigtime drug trafficker ang nasakote matapos masamsaman ng P13.6 milyong halaga ng shabu sa isinagawang anti-drug operation ng mga awtoridad sa harap ng isang fastfood chain sa Plaza Pershing, Brgy. Zone IV, Zamboanga City nitong Biyernes ng hapon.
Kinilala ang mga nasakoteng suspek na sina Nursibar Ekong alyas Jamal, 29-anyos; Tupay Kali, 32, at Gajier Ahmad, 29; pawang ng Brgy. Mampang sa nasabing lungsod.
Sa ulat ni Chief Supt. Emmanuel Luis Licup, director ng Police Regional Office (PRO) 9, nagsagawa ng operasyon ang pinagsanib na elemento ng Zamboanga City Police at Philippine Drug Enforcement Agency (PDEA) 9 sa harap ng sikat na fast food chain sa Plaza Pershing, bandang alas -2 ng hapon.
Ayon kay Licup, nakipag-deal ang isang poseur buyer sa mga suspek sa lugar para bumili ng droga. Habang iniaabot ng mga suspek ang isang plastic sachet ng droga na may halagang P1,000 sa buyer ay agad na lumutang ang iba pang operatiba at inaresto ang tatlo. Nang inspeksyunin ang dalang bag ng mga suspek, nakuha rito ang karagdagang 3-kilo ng droga na nakalagay sa isang plastic bag at isang paper bag. (Rhoderick Beñez)
- Latest
