Ama todas sa taga ng anak
Pag-evacuate, pinagtalunan
MANILA, Philippines — Patay ang isang 64-anyos na ama matapos pagtatagain sa ulo ng kanyang sariling anak na tumanggi sa hikayat na lumikas sa kanilang bahay dahil sa pinangangambahang landslide sa kanilang lugar sa liblib na kabundukan ng Sitio Yogyog, Barangay Pugong, Pasil, Kalinga noong Lunes.
Sanhi ng mga tinamong tama ng taga sa ulo, hindi na umabot pang buhay sa pagamutan ang biktimang si Luis Danoto habang arestado naman ang anak na si Julius, 22-anyos.
Sa ulat ng pulisya, dakong alas-8:30 ng gabi nang magtalo umano ang mag-ama dahil tumangging sumama ang anak sa umano’y preventive evacuation na pinanawagan ng kanilang alkalde makaraang i-report ng Bureau of Mines and Geosciences (MGB) ang nadiskubreng active faultline sa lugar.
Batay sa imbestigasyon, nauwi sa pananaga ng anak sa ulo ng ama ang kanilang mainit na sagutan.
Sinikap isugod ng mga kaanak ang matanda sa pagamutan subalit idineklara na itong patay habang kinuyog naman ang nakababatang suspek na kanilang isinuko sa pulisya bitbit ang ginamit na itak na may bahid ng dugo.
- Latest
