MANILA, Philippines — Nilamon ng ilog ang isang 39-anyos na mister matapos na lumubog ang sinasakyan nilang bangka habang nakaligtas ang isang kasamang mangingisda nito sa ilog ng Brgy. Pilar sa Diplahan, Zamboanga Sibugay kamakalawa.
Kinilala ang nasawing biktima na si Nenito Salenas, ng Brgy. Gaulan, Diplahan.
Ang biktima ay narekober ang katawan sa ilog matapos ang ilang oras na bagaman nagawa pang maisugod sa Wilfredo Palma Memorial Hospital ay idineklarang dead-on-arrival.
Sa ulat ng Police Regional Office (PRO) 9, bandang alas-2:30 ng madaling araw nang aksidenteng lumubog ang pumpboat na sinasakyan ng biktima at ng kasama nitong mangingisda sanhi ng malakas na agos ng tubig sa malalim na bahagi ng nasabing ilog. Nagawa namang makakapit sa kawayan na bahagi ng nasirang pumpboat ang biktima kung saan ay pansamantala itong iniwan ng kanyang kasamang mangingisda na si Eduardo Villa, 56 taong gulang.
Si Villa ay lumangoy patungo sa pampang na humingi ng tulong sa kapitan ng Barangay at mga residente sa lugar. Nang balikan nila ang biktima, tuluyan na siyang nilamon ng tubig at dakong alas-11 ng tanghali ay lumutang ang katawan nito na bagaman nagawa pang maisugod sa pagamutan pero idineklarang dead-on-arrival.