Van sumalpok sa bahay: 2 durog
LEGAZPI CITY, Albay, Philippines — Nagkalasug-lasog ang katawan ng dalawang helper habang sugatan ang driver ng isang delivery wing van matapos mawalan ng kontrol at bumangga sa bahay sa tabi ng Maharlika National Highway sa Purok-5, Brgy. Tuaca, Basud, Camarines Norte kamakalawa.
Dead-on-arrival sa Camarines Norte Provincial Hospital sa Daet ang biktimang si Mark Christian Falabi, 27-anyos, ng Brgy. Mambulo Nuevo, Libmanan, Camarines Sur habang si Alvin Alipis, 34-anyos, ng Brgy. Concepcion Grande, Naga City ay nasawi habang nilalapatan ng lunas.
Patuloy namang inoobserbahan ang lagay ng sugatang driver na si Francis Bonavente, 34, ng Brgy. Mambolo Nuevo, Libmanan.
Sa ulat, dakong alas-11 ng umaga, mabilis na binabagtas ng delivery wing van (RFF-366) ang highway na minamaneho ni Bonavente nang mawalan ng preno. Dahil sa bilis ng takbo, tuluyang nawalan ng kontrol sa manibela ang driver at rumampa sa damuhang bahagi sa gilid ng kalsada at tuluy-tuloy na sumalpok sa isang bahay na kapwa ikinasawi ng dalawang helper.
Agad na sinaklolohan ng mga residente ang mga biktima at isinugod sa ospital subalit kapwa idineklarang patay dahil sa mga matitinding sugat sa ulo at katawan.
- Latest