3 holdaper utas sa shootout
TAYABAS CITY, Philippines — Patay ang tatlong pinaghihinalaang miyembro ng highway robbery group makaraang makipagbarilan sa mga awtoridad sa Brgy. Malao-a ng lungsod, lalawigan ng Quezon kamakalawa ng madaling araw.
Nakilala lamang sa mga alyas na Jeremy, John Kerby at Magno ang mga napaslang na sinasabing mga kasapi ng “Buriko Group.”
Ayon sa bagong talagang chief of police rito na si P/Supt. Mark Joseph Laygo, nagsagawa sila ng follow-up operation dakong alas-12:15 ng madaling araw kasama ang mga operatiba ng Quezon PIB matapos na holdapin ng nasabing grupo sa Barangay Opias ang mga biktimang sina Jayson Palambiano, 22, ng Brgy. San Diego Zone 1; Cynthia Calabano, 20 ng Brgy. Opias at Renee Rose Balagtas, 21 ng Brgy. Camaysa.
Tinangay ng mga suspek buhat sa mga biktima ang isang motorsiklo, mga cellphone at P15,000 cash saka tumakas patungo sa direksyon ng Sariaya, Quezon.
Nang magpositibo ang impormasyon sa kinaroroonan ng mga suspek sa provincial road ay agad silang pinahinto ng mga pulis subalit sa halip na sumuko ay nagpaputok sila ng baril kung kaya napatay sa shootout.
Nabawi ng mga awtoridad sa mga suspek ang mga nakulimbat nila sa mga biktima at dalawang homemade Smith and Wesson caliber 38.
- Latest