Onsehan sa droga: ‘Pusher’ itinumba
MANILA, Philippines — Pinaniniwalaang onsehan sa droga ang dahilan upang mapatay ang isang sinasabing notoryus na ‘tulak’ matapos na pagbabarilin at mapatay ng tatlong ‘di pa nakilalang tatlong armadong lalaki na lulan ng motorsiklo sa Brgy. Bakilid, Mandaue City, Cebu kahapon ng umaga.
Kinilala ang biktima na si Ernesto Altejar, 48-anyos, tubong Dumaguete City, Negros Oriental.
Ang biktima ay nagtamo ng mga tama ng bala sa iba’t-ibang bahagi ng katawan na siya nitong dagliang ikinamatay.
Sa ulat ng Police Regional Office (PRO) 7, nangyari ang insidente bandang alas-8:00 ng umaga, habang nakatayo ang biktima sa bangketa sa naturang lugar nang biglang sumulpot ang isang motorsiklo na sinasakyan ng tatlong lalaki at agad itong pinaulanan ng bala hanggang sa duguang bumulagta.
Nabatid na ang biktima ay nasa drug watchlist ng mga awtoridad at hinihinalang may kinalaman sa onsehan sa droga ang pamamaslang dito.
Patuloy ang masusing imbestigasyon ng mga awtoridad sa kasong ito.
- Latest