SUV salpok sa payloader: 1 patay, 8 sugatan

LEGAZPI CITY, Albay  , Philippines  —   Isa katao ang patay habang walo ang sugatan kabilang ang mga dayuhang bumibisita sa bansa matapos na bumangga ang kanilang sinasakyang SUV sa nakaparadang payloader sa kahabaan ng national road ng Brgy. Kilikilihan, San Miguel, Catanduanes kamakalawa ng umaga.

Isinugod lahat ang mga sugatan sa Immaculate Heart of Mary Hospital Inc sa bayan ng Virac pero idineklarang patay ang isa sa pasaherong si Nena Padernal, 66-anyos.

Kinilala ang mga sugatan na inoobserbahan sa naturang ospital na sina Marchelle Uchi, 44, driver ng SUV (XHT-455); Michael Uchi, 72; Leonor Uchi, 70; Leny Uchi, 35 at Doming Padernal, 59 anyos, lahat ay residente ng Brgy. San Vicente, Viga at ang mga bisitang dayuhan na sina Rechilda Pomerleau, 42; at mga batang sina Steven Pomerleau, 8, at Alex Pomerleau, 5, pawang tubong Genis Powilly, France.

Sa ulat, dakong alas-11 ng umaga, mabilis na binabaybay ng SUV ang kahabaan ng highway patungong bayan ng Virac nang mawalan ng kontrol ang driver na si Marchelle at sumalpok sa nakaparadang payloader sa tabi ng highway. Sa lakas ng bangga, nawasak ang sinasakyang SUV ng mga biktima.