MANILA, Philippines — Karumal-dumal ang sinapit na kamatayan ng isang 22-anyos na emplayada ng isang cellphone and gadget pawnshop makaraang looban at pagnakawan ng mga suspek ang pinapasukan niyang establisyimento kamakalawa ng hapon sa Abnao St., sa lungsod ng Baguio.
Natagpuang patay na nakatali ang mga kamay at paa ng packing tape ni Lindsay Valdez ng Urdaneta, Pangasinan.
Ayon sa report, naliligo sa sariling dugo dahil sa nilaslas na lalamunan si Valdez sa loob ng 202 Cellphone Pawnshop nang siyasatin ng SOCO ang lugar dakong ala-1:40 ng hapon.
Pinaniniwalaang pinasok ng mga kawatan ang pawnshop sa maliit na entrada nito habang naglilinis ang biktima bago magbukas ng alas-8:00 ng umaga.
Sinabi sa pulisya ng may-ari ng pawnshop na si Julio Parayno III na nagawang buksan ng mga salarin ang kanilang cash vault at tinangay ang laman nitong cash na nagkakahalaga ng P87,434.