CAVITE , Philippines — Patay ang isang retiradong pulis mula sa kamay ng kanyang sarilng kapatid matapos na mauwi sa pamamaril ang kanilang pagsusuntukan makaraan ang mainitang pagtatalo kamakalawa sa Brgy. Gregorio. Trece Martirez City.
Namatay agad ang biktima na nakilalang si Severo Lubigan, 59, residente ng Brgy. Gregorio Trece Martirez City dahil sa tama ng bala sa katawan.
Nakatakas naman ang suspek na si Bonifacio Lubigan, nasa hustong gulang, nakababatang kapatid ng biktima.
Sa ulat, dakong alas-10:00 ng umaga nang magtalo umano ang magkapatid hanggang sa mauwi pa ito sa suntukan. Nadehado ang suspek kung kaya sa sobrang pagkapikon at galit nito ay kinuha nito ang kanyang baril at binaril ang kuya. Duguang bumagsak ang biktima habang mabilis na tumakas ang suspek tangay ang baril na ginamit na pinaghahanap ng mga awtoridad.
Nagawa pang maitakbo sa MV Santiago Medical Center Trece Martirez Cavite ang retiradong pulis subalit idineklarang patay.