Parak na napatay sa drug ops ginawaran ng medalya
GENERAL TINIO, Nueva Ecija , Philippines — Ginawaran ni PNP chief, Director General Oscar Albayalde ng Medalya ng Kadakilaan (Medal of Heroism) si PO1 Mariano Emmanuel Caparas, matapos na magbuwis ng buhay sa isang drug buy-bust operation noong Hulyo 16.
Bagama’t matindi ang bugso ng ulan, hindi napigilan si Albayalde, kasama si Chief Supt. Amador Corpus, Police Regional Director ng Central Luzon at ilan pang matataas na opisyal ng PNP, sa pagbisita sa burol ni PO1 Caparas nitong Huwebes ng hapon at nakahimlay sa naiwang pamilya nito sa Barangay Bago.
Ibinalita ni Albayalde sa mga media na ang nasawi ay hindi buyer ng droga kundi kasama sa naturang operation kaya nang mapansin ng suspek na mga alagad ng batas ang kanyang katransaksyon ay nagpaputok ng walang patumangga ang suspek na tumama sa biktima. Hindi nakasuot ng bullet proof si Caparas kaya nabaril at napatay ng suspek na si Albert Gutierrez, na napaslang din ng mga kasamahan ng una.
Samantala, sinabi ni Laika, misis ng nasawing pulis na kaya pala naglalambing ang kanyang asawa noong umagang iyon ay mawawala na pala siya. “Yakapin ko raw siya nang matagal, halos dalawang oras po kaming nakahigang magkayakap, ‘yon pala ang huling yakap ko sa kanya,” mangiyak-ngiyak na sabi ni Laika.
- Latest