Bahay nasunog: Mag-utol dedo
LEGAZPI CITY, Albay , Philippines — Patay ang magkapatid habang sugatan naman ang kanilang ama makaraang masunog ang kanilang bahay sa Barangay Bacong sa Ligao City, Albay kamakalawa ng umaga.
Kinilala ang magkapatid na si Rochelle Lovendino, 23; at Rhea Lovendino, 13, habang ginagamot sa ospital ang kanilang tatay na si Benjamin Lovendino dahil sa tinamong sugat.
Sa police report na nakarating sa Camp Simeon Ola, nagluluto umano sa kusina ang isa sa mga biktima nang biglang sumabog ang tangke ng liquified petroleum gas (LPG).
Mabilis na kumalat ang apoy at nasunog ang kanilang bahay kung saan nakulong ang magkapatid habang sugatang nakaligtas ang kanilang ama.
Natagpuan ang bangkay ng magkapatid sa loob ng palikuran na posibleng pinagtaguan ng dalawa makaraang hindi sila agad nakalabas sa nasusunog na bahay.
- Latest
