KIDAPAWAN CITY, North Cotabato , Philippines – Napaslang ang apat-katao kabilang ang barangay chairman makaraang pagbabarilin ng mga di-kilalang gunmen na sakay ng van sa panibagong karahasang naganap sa Barangay Tamontaka Mother, Cotabato City, Maguindanao kahapon ng hapon. Kinilala ang mga biktima na sina Barangay Chairman Mokamad Manisi Pasawilan, 65; Kagawad Unting Pasawilan Manisi, Jhony Ali Manisi, 49; at si Anding Ali Manisi, 46, treasurer sa Barangay Bagoinged sa bayan ng DOS sa Maguindanao. Ayon kay P/Chief Insp. Rostum Pastolero, hepe ng Police Station 3 ng Cotabato City police, si Chairman Mokamad ay una nang nag-surface sa mga awtoridad makaraang masangkot ito sa drug trade noong December 2016. Narekober sa crime scene ang 30 basyo ng bala ng cal.45 pistol, 33 basyo ng bala ng M16 Armalite rifle at 2 basyo ng Carbine.